गल्छी–रसुवागढी सडकखण्डको अवलोकन

विदुर, राष्ट्रिय गौरबको आयोजना गल्छी–रसुवागढी सडकखण्ड निर्माणको प्रगतिबारे उच्चस्तरीय टोलीले स्थलगत निरीक्षण गरेको छ । सडक विभागका महानिर्देशक केशवकुमार शर्माको नेतृत्वको ३ सदस्यीय उच्च स्तरिय टोलीले गत हप्ता सडकखण्डको निरीक्षण गरेको हो ।

निरीक्षण टोलीमा विभागका महानिर्देशक शर्मासहित उपमहानिर्देशक भिमार्जुन अधिकारी र संघिय सडक सुपरिवेक्षण काठमाडौंका सुपरिटेन्डेन्ट इन्जिनियर राजेन्द्र शर्मा सहभागी थिए । टोलीले गल्छिदेखि रसुवागढीसम्मको ८२ किलोमिटर सडकको स्थलगत निरीक्षण तथा अवलोकन गरेको गल्छी–त्रिशुली–मैलुङ–स्याफ्रुवेंशी–रसुवागढी सडक योजनाका प्रमुख नारायणदत्त भण्डारीले जानकारी दिनुभयो । टोलीले गल्छिदेखि मैलुङसम्मको निर्माणाधिन ४६ किलो मिटरसडक र पुलकोसमेत निरीक्षण गरेको थियो ।

अनुगमनको क्रममा कोल्पु खोला, देविघाट र तिरतिरेको पहिरो रोकथाम सम्बन्धि कामलाई अगाडि बढाउन टोलीले सडक गल्छी–त्रिशुली–मैलुङ–स्याफ्रुवेंशी–रसुवागढी सडक योजनालाई निर्देशन दिएको छ । मैलुङदेखि स्याफ्रुवेंशीसम्मको १९ किलोमिटर सडकखण्डको बोलपत्र आह्वानको प्रक्रियामा रहेकोले त्यसलाई छिट्टै टुङ्गाउन पनि टोलीले निर्देशन दिएको छ ।

चीन सरकारको सहयोगमा निर्माण हुने स्याफ्रुवेंशीदेखि रसुवागढीसम्मको १७ किलोमिटर सडक निमार्ण कार्यमा सहजिकरण गरिदिन टोलीले आग्रह गरेको छ । जग्गा प्राप्ति गर्ने, बिद्युतका पोलहरु सार्ने र सडक सिमा भित्रका घर–टहरा हटाउने जिम्मा नेपाली पक्षको रहेकाले नेपाल तर्फबाट गर्नुपर्ने काम छिट्टै टुङ्ग्याउन आग्रह गरिएको योजनाका प्रमुख भण्डारीले जानकारी दिनुभयो ।