सेनाको तालिम गण मैथलीमा फुटवल मैदान

बट्टार, नेपाली सेनाको श्री नं.१ तालिम गण मैथली शिविर नुवाकोटको गण हाताभित्र निर्मित राष्ट्रियस्तरको फुटबल मैदानको फागुन १२ गते विदुर नगरपालिकाका प्रमुख सञ्जु पण्डितले उद्घाटन गर्नुभयो ।

विदुर नगरपालिका, नेपाल विद्युत् प्राधिकरण नुवाकोट, नुवाकोट जिल्ला खेलकुद विकास समिति, गल्छी–त्रिशूली–मैलुङ्ग–स्याफ्रुवेंशी–रसुवागढी सडक योजना र ताँदी खोला क्रसर उद्योगको भौतिक सहयोगमा निर्मित उक्त मैदानको साईज १०० ह् ६४ मिटर रहेको छ । खेल मैदानको उद्घाटन पश्चात् आयोजना गरिएको नं.१ तालिम गण र एन्फा ११ नुवाकोटबिच भएको फुटबल प्रतियोगितमा नं.१ तालिम गणको टिम २/१ गोल अन्तरले विजय भएको थियो । विजयी टिमलाई प्रमुख अतिथि विदुर नगरपालिकाका प्रमुख पण्डितले खसी उपहार प्रदान गर्नुहुँदै स्थानीय र गणका सेनाबीच समयसमयमा फुटबल प्रतियोगिता गर्न सुझाव दिनुभयो ।

सो कार्यक्रममा गणका गणपति प्रमुख सेनानी खेमराज शर्माले फुटबल मैदानलाई नेपाली सेनाले मात्र नभई आवश्यक परेमा स्थानीय संघ, संस्थाले स्वीकृत लिएर प्रतियोगितामा समेत उपभोग गर्न सक्ने बताउनु भयो ।