डोल्माको टिमुर खेतीबाटै आम्दानी गर्ने अठोट

धुन्चे, हिमाली जिल्ला रसुवामा औषधीय गुण भएका एक दर्जनभन्दा बढी जडीबुटी खेतीको प्रचुर सम्भावना भए पनि जडीबुटी खेती गर्नेतर्फ चासो राख्नेको सङ्ख्या भने न्यून रहेको छ । जडीबुटी खेतीको प्रचुर सम्भावनालाई व्यवहारमा उतार्न गोसाइँकुण्ड गाउँपालिका–३ वृद्धिमकी नुर्पुडोल्मा तामाङले आफ्नै सात रोपनी जग्गामा २६ हजार टिमुरको बिरुवा रोपेकी छिन् । उनले टिमुर खेतीबाट मनग्य आम्दानी गर्ने अठोट लिएकी छिन् ।

घरेलु कार्यालय रसुवामा टिमुर खेतीको फर्म दर्ता गरी गत साउन र भदौ दुई महिना लगाएर २६ हजार टिमुरको बिरुवा रुकुमबाट किनेर ल्याएर डोल्माले रोपेकी छिन् । उनको लगन र मिहिनेतको प्रशंसा गर्दै वन कार्यालय रसुवाले पनि एक हजार ६ सय टिमुरको बिरुवा निःशुल्क दिएको छ । श्रीमान्सहित घरपरिवारको साथ र सहयोगमा उनले टिमुर खेतीको सुरुवात गरेकी हुन् । अहिलेसम्म आफ्नै लगानीमा बिरुवा रोपेको क्षेत्रमा तारबारसहित थप व्यवस्थित गरिरहेको डोल्माले बताइन् । मसला तथा औषधीजन्य समूहमा पर्ने टिमुरको बिरुवा रोपेको तीन वर्षजतिमा फूल फुल्ने र चौथो वर्षदेखि फल फल्ने कृषि प्राविधिकले बताएका छन् । टिमुरको अलावा सिजनअनुसारको उनले अर्गानिक तरकारी खेतीसमेत गरिरहेकी छिन् । आफ्नो गाउँ–ठाउँको जग्गा–जमिन बाँझो राखेर अहिलेका युवा विदेश जान तम्सिनेका लागि डोल्मा प्रेरणाको स्रोत बनेकी छिन् । आम्दानी चाँडै नहुन सक्छ, तर दिगो रूपमा पछि त आम्दानी हुन्छ भन्ने लागेर टिमुर खेतीतर्फ लागेको डोल्मा बताउँछिन् । जहाँ गए पनि दुःख गर्नैपर्छ, पैसा रूखमा फल्दैन, त्यसैले बुढासँग सल्लाह गरेर विदेश नगई आफ्नै गाउँमै परम्परागत रूपमा गर्दै आएको कृषि पेसालाई परिमार्जित गरेर नयाँ तरिकाले खेती सुरु गरेको बताइन् । कहिलेकाहीँ त आफूसरहका साथी रमाएर सहरमा बसिरहँदा आफूलाई पनि रहर जाग्थ्यो, तैपनि दुःख त गर्नैपर्छ भनेर टिमुर खेती आफूखुशी गरेको उनले बताइन् । व्यावसायिक रूपमा रसुवाको वृद्धिममा टिमुर खेती सुरुवात गरेको देखेर अहिले उनका साथी र छिमेकीले पनि चासो दिन थालेका छन् । नेपालको ७७ जिल्लामध्ये स्याङ्जामा सबैभन्दा बढी टिमुरको खेती भइरहेको छ । यसबाहेक रुकुम, जाजरकोट, सुर्खेत, दैलेख, रोल्पा, म्याग्दी, गुल्मी, बागलुङ, पाल्पा र पर्वतलगायत हिमाली जिल्लामा टिमुरको खेतीका लागि उपयुक्त हावापानी रहेको छ ।