विदुर । बागमती प्रदेश सरकारअन्तर्गत खानेपानी, ऊर्जा तथा सिँचाइ मन्त्रालयमातहतको खानेपानी तथा सरसफाइ डिभिजन नं. ६ कार्यालय नुवाकोटमा सोमबार स्थापना भएको छ । उक्त कार्यालय सङ्घीयता कार्यान्वयनपछि धादिङमा गाभिएको थियो ।

नुवाकोटमा स्थापना भएको उक्त कार्यालयको उद्घाटन बागमती प्रदेशका मुख्यमन्त्री बहादुरसिंह लामाले सोमबार उद्घाटन गरेका हुन् । प्रदेश सरकारको उद्देश्य जनतालाई सहज रूपमा सेवा प्रदान गर्नु रहेको बताउँदै मुख्यमन्त्री लामाले जनता खुसी भए मात्र सरकार सफल हुने बताए । जिल्लामा कार्यालय स्थापनासँगै खानेपानी, ढल व्यवस्थापन, सरसफाइसम्बन्धी कामका लागि सेवाग्राही धादिङमा पुग्नुपर्ने अवस्थाको अन्त्य भएको छ । यसअघि धादिङमा रहेको कार्यालयले नुवाकोट हेर्दै आइरहेको थियो । निमित्त डिभिजन प्रमुख दिलीपकुमारले कार्यालयलाई व्यवस्थापन गरेर छिट्टै कामलाई अगाडि बढाउने बताए । नुवाकोटको विदुरमा खानेपानी तथा सरसफाइ डिभिजन कार्यालयको यसअघि सम्पर्क कार्यालय रहेको थियो । कार्यालयको नाममा पहिलेदेखि नै विदुरमा दुई रोपनी जग्गामा कम्पाउन्डसहित दुईतलाको १२ कोठाको कार्यालय भवन रहिरहेको थियो ।