विदुर । किराँत देवास राई उत्थान समाज नेपालको छैटौँ राष्ट्रिय सम्मेलन नुवाकोट, विदुर-४ बट्टारमा यही शनिबार हुने भएको छ । सम्मेलनमा सहभागी हुने किराँत देवास राईको वेशभूषामा आउन सहभागीलाई आग्रह गरिएको छ ।

नुवाकोटसहित नौ जिल्लामा रहेका किराँत देवास रार्ईको सम्मेलनमा पाँच सयभन्दा बढी प्रतिनिधि र पर्यवेक्षक सहभागी हुने समाजका केन्द्रीय अध्यक्ष आशमान राईले जानकारी दिनुभयो । सम्मेलनको तयारी पूरा भइसकेको किराँत देवास राई उत्थान समाज नुवाकोटका अध्यक्ष भोलाचन्द्र राईले बताउनुभयो । सम्मेलनमा किराँत देवास राईको वेशभूषा, कला, संस्कार, संस्कृतिबारे बृहत् रूपमा जानकारीका साथै प्रदर्शनी हुने नुवाकोटका सचिव पूर्णबहादुर राईले बताउनुभयो । ‘आफ्नो कला, भाषा, संस्कृति संरक्षण गरौँ, जातीय उत्थानमा सहभागी बनौँ’ भन्ने नाराका साथ हुन लागेको सम्मेलनमा रु.पाँच हजारमाथि सहयोग गर्नेलाई आजीवन सदस्य स्वतः प्रदान हुनेसमेत जानकारी गराइएको छ ।