तह-तहका सरकारले मनमौजी निर्णय गर्न नपाए त सङ्घीय व्यवस्था खतरामा पर्ने भएसि नेपाली जनताको नो कमेन्ट । व्यवस्थाका नाममा अर्थाेपार्जन र अधिकार दुरुपयोग गर्न जनप्रतिनिधिभन्दा पनि स्थायी सरकार पछि पर्ने त कुरै भएन । कर्मचारीको कुलिङ पिरियड काण्डले सांसदलाई नै उदाङ्गो पारेपछि अदुअआ भन्ने जन्तु ट्वाँ परेको पनि देखिएकै हो । तिनै सरकारका सार्वजनिक बिदा घोषणाबाट आजित न्वाँकोट बेलकोटगढीवासीको दैलाको सरकारको अस्वाभाविक निर्णय र आदेश भाइरल भा’को पनि तीनआँखेले चाल पाइहाल्यो । अघिल्लो महिना आत्महत्या गरेका शिक्षकको यही भदौ २ मा शोकसभा गर्ने पालिका सरकारको निर्णय भन्दै निमित्त हाकिम सा’पको उर्दी देख्दा पनि लाजमर्नु नै भयो भन्या ! पालिकाको आदेश साढे चार दर्जन विद्यालयले नमानी सुखै पाएनन् । गत साउन २० गते सुसाइड गरेका एकराम सरको अन्त्येष्टिको १४ दिनमा शोक मनाउँदा आत्माले शान्ति नै पाएको हुँदो हो । पालिका प्रमुख र उपप्रमुख सीमा मिच्ने छिमेकी देश गैससको लगानीमा घुम्न जाँदा पालिकाभरि बिदाको उत्सव मनाइएको दृश्य पनि त्रिनेत्रलाई भारी आनन्द लाग्यो है !