विदुर । नुवाकोट उद्योग वाणिज्य सङ्घले शुक्रबार आगलागी पीडित व्यवसायीलाई नगद र अलैची कृषक समूहलाई अलैची सुकाउने भट्टि सेट हस्तान्तरण गरेको छ । गत साउन ७ गते विदुर-१ ढुङ्गेमा रहेको नवराज श्रेष्ठको न्यू श्रेष्ठ होटल आगलागी भएको थियो ।

आगलागीबाट भएको क्षतिमा सहयोग गर्न सङ्घले रू.२० हजारको चेक होटल सञ्चालक श्रेष्ठलाई भदौ १३ गते प्रदान गरेको हो । सोही कार्यक्रममा बेलकोटगढी नगरपालिका-११ का चिनीमाया तामाङ (केएस अलैची तथा फलफुल फर्म), गुणबहादुर तामाङ (बिन कृषि तथा पशुपंक्षी फर्म), सुरेश तामाङ (डेरी टोल कृषि फर्म) र सुकबहादुर तामाङ (अलैची कृषि तथा पशुपंक्षी फर्म) लाई अलैची भट्टि सुकाउने सेट प्रदान गरिएको सङ्घका वरिष्ठ उपाध्यक्ष सन्तोष उप्रेतीले बताउनुभयो । सो कार्यक्रममा सङ्घका अध्यक्ष राजेन्द्र श्रेष्ठ, पूर्व अध्यक्ष शरणउत्सुक सापकोटा, प्रथम उपाध्यक्ष दिनेश श्रेष्ठ, द्वितीय उपाध्यक्ष सबिन राजभण्डारी, कोषाध्यक्ष मेघनाथ घिमिरेलगायतको उपस्थिति रहेको कार्यकारिणी सचिव इश्वर डंगोलले बताउनुभयो ।