धुन्चे । नेपाल-चीन प्रमुख व्यापारिक नाका रसुवागढीमा गत असार २४ र साउन १४ गते एक्कासि आएको ल्हेन्दे खोलाको बाढीले क्षति पु¥याएपछि सो क्षेत्र सुनसान बनेको छ । बाढीका कारण स्याफ्रुबेँसीदेखि रसुवागढीसम्मका अधिकांश सडकखण्ड ध्वस्त भएपछि पूर्ण रूपमा सडक अवरुद्ध भएको थियो । बाढीले मितेरी पुल बगाउँदा रसुवागढी-केरुङ जोड्ने प्रमुख व्यापारिक नाका पूर्ण रूपमा बन्द भएको छ ।

मितेरी पुल भएको स्थाननजिकै बेलिब्रिज निर्माणका लागि चिनियाँ सरकारले काम थालेको छ । यही भदौभित्र अस्थायी पुल बनाउने गरी काम भइरहेको रसुवाका सहायक प्रमुख जिल्ला अधिकारी दु्रवप्रसाद अधिकरीले बताउनुभयो । पुल निर्माण भइसक्दा स्याफ्रुबेँसीदेखि रसुवागढीसम्मको सडक दुवैतर्फ   सञ्चालनमा ल्याउने गरी गल्छी-त्रिशूली-मैलुङ-स्याफ्रुबेँसी-रसुवागढी सडक योजनाले काम गरिरहेको छ । गोसाइँकुण्ड-२ का अध्यक्ष कामीछिरिङ तामाङका अनुसार बाढीका कारण स्याफ्रुबेँसीदेखि रसुवागढीसम्मको सडक मर्मत गरी एकतर्फी सञ्चालनमा आए पनि त्यस क्षेत्रको जनजीवन सुनसान रहेको छ ।

बाढीले क्षति पुर्याएको स्याफ्रुबेँसी-रसुवागढी सडकखण्ड डेढ महिना बितिसक्दा पनि अझै दुईतर्फी सञ्चालनमा आउन सकेको छैन । सडक अवरुद्ध हँुदा यात्रु पैदल यात्रा गर्न बाध्य छन् भने टिमुरेबजारको व्यापार पनि ठप्प भएको छ । चीनतर्फबाट लेन्दे्रखोलामा आएको बाढीले करिब दुई किलोमिटर सडक कटान गरेपछि यातायात पूर्ण रूपमा अवरुद्ध भएको हो । गल्छी-त्रिशूली-मैलुङ-स्याफ्रुबेँसी-रसुवागढी सडक योजनाका इन्जिनियर रूपनारायण पौडेलले कडा चट्टानका कारण काममा ढिलाइ भएको बताउनुभयो । उहाँले भन्नुभयो, ‘एउटा उपकरण मात्र प्रयोग गर्न सकिने अवस्था भएकाले मर्मतसम्भारको गति सुस्त भएको हो, तैपनि मर्मत कार्य नियमित भइरहेको छ ।’ उहाँका अनुसार सडक पुनर्निर्माण सम्पन्न गर्न अझै एक सातासम्म लाग्ने देखिएको छ । स्थानीय व्यापारी र यात्रुले भने लामो समयदेखि अवरुद्ध सडकका कारण ठुलो असुविधा खेपिरहेका छन् । वैकल्पिक बाटो भएर गन्तव्य पुग्न निकै समय लाग्ने गरेको छ । गत असार २४ को बाढीमा पनि सो सडकको करिब एक किलोमिटर भागमा क्षति पुगेको थियो ।