विदुर । नेकपा (एमाले) जिल्ला कमिटी नुवाकोटले दलको विधानअनुसार १२ वटै पालिकाको अधिवेशन आगामी मङ्सिर महिनाभित्र तालिका बनाएर सक्ने तयारी गरेको छ । जिल्लाको निर्देशनअनुसार विदुर नगर कमिटीको अधिवेशन मङ्सिर २९ गते हुने भएको छ ।

अधिवेशनको मिति तोकेपछि नगरको नेतृत्वमा दुई आकाङ्क्षी देखिएका छन् । नगर कमिटी अध्यक्षमा सञ्जीवबहादुर श्रेष्ठ र अनुजकुमार श्रेष्ठले दाबी गरेका छन् । सञ्जीव जिल्ला कमिटी पूर्वसदस्य र नगर कमिटिका पूर्वइन्चार्ज तथा अनुज नगर कमिटीका कार्यवाहक अध्यक्ष हुन् । दुवैलाई केन्द्रदेखि जिल्लास्तरीय नेताले सर्वसम्मत् नगर्न निर्देशन दिइरहेका छन् । एमालेमा गुट अन्त्य भएको घोषणा गरिए पनि जिल्ला तहका नेता गुट–उपगुट बनाएर वडादेखि जिल्ला अधिवेशनमा भिडिरहेका छन् । पालिकाको अधिवेशनमा गुट–उपगुट सतहमा आउने गरी केही नेता सलबलाइरहेको जिल्ला कमिटीका एक पदाधिकारीले त्रिशूली प्रवाह साप्ताहिकलाई बताए । विदुर नगर कमिटी अध्यक्ष, उपाध्यक्ष, सचिव, दुई उपसचिव (एक महिला, एक पुरुष)सहित ७५ सदस्यीयसम्म बनाउने सुविधा विधानले दिएको छ । नगर अधिवेशनको मिति तोकिएपछि अन्य पालिकाभन्दा विदुर र बेलकोटगढी नगरपालिका कमिटीमा गुटगत टोली बनाउने तयारीमा नेताहरू कोठेबैठकमा व्यस्त हुन थालेका छन् । केही महिनाअघि सम्पन्न जिल्ला अधिवेशनमा बद्री मैनाली र बुद्धिबहादुर प्रधान दुई टोली बनाएर निर्वाचनमा गएका थिए । उक्त अधिवेशनबाट मैनालीको टोलीले जिते पनि जिल्लागत अन्य चार गुटका पदाधिकारी र सदस्य विभाजित भएर विजयी भएका छन् ।