चार महिनामा रसुवा आएका पर्यटकको खर्च ४० करोड

धुन्चे । रसुवा जिल्लामा भ्रमण गर्ने पर्यटकले चालू आर्थिक वर्ष २०८०/०८१ को चार महिनामा मात्रै सरदर रु. ४० करोड आर्थिक कारोबार गरेका छन् । सो अवधिमा झन्डै २६ हजार आन्तरिक तथा बाह्य पर्यटक जिल्ला भित्रिएको देखिन्छ । पर्यटन तथा होटेल व्यवसायी सङ्घ रसुवाका अध्यक्ष रामशरण गजुरेलका अनुसार जिल्ला भ्रमण गर्ने पर्यटकले सरदर रु. १५ हजार खर्च गर्छन् । चालू आवको सो अवधिमा झन्डै रु. ४० करोड पर्यटकले खर्च गरेको उनको जिकिर छ ।

खासगरी तीर्थस्थल गोसाइँकुण्डलगायत एक सय आठ कुण्ड तथा नेपालको तेस्रो पर्यटक गन्तव्य लाङटाङ, चीन–नेपाल स्थलगत मार्गबाट आयात–निर्यात हुने रसुवागढी नाका, तातोपानीका धारा तथा कुण्ड, तामाङ सम्पदामार्गमा पर्यटक आउने गर्छन् । चालू आवका साउन, भदौ, असोज, कात्तिकमा रसुवा प्रवेश गर्ने पर्यटकको लाङटाङ राष्ट्रिय निकुञ्जले धुन्चेनजिकै ब्राबलमा रहेको प्रवेशद्वारमा अभिलेख राख्ने गरेको छ । उक्त प्रवेशद्वारमा विवरण दर्ता र प्रवेश शुल्क नतिरी प्रवेश गर्न पाइँदैन । निकुञ्जको विवरणअनुसार चालू आवको सो अवधिमा २२ हजार दुई सय १८ आन्तरिक तथा बाह्य पर्यटकले रसुवा भ्रमण गरेका थिए । निकुञ्ज प्रवेशद्वारबाट रसुवा प्रवेश गर्नेले शुल्क तिर्नुभन्दा गलत विवरण दर्ता गरी धुन्चे र स्याफ्रुबेँसी जाने गर्छन् । निकुञ्जमा विवरण दर्ता नगराई सो अवधिमा तीन हजारभन्दा बढी गलत विवरण दर्ता गरेर प्रवेश गरेको हुन सक्ने रसुवाका होटेल व्यवसायी बताउँछन् । निकुञ्जको तथ्याङ्क र व्यवसायीले बताएको सङ्ख्या जोड्दा चालू आवका चार महिनामा झन्डै २६ हजार आन्तरिक तथा बाह्य पर्यटक रसुवा जिल्ला भित्रिएको देखिन्छ । निकुञ्जका संरक्षण अधिकृत एवम् सूचना अधिकारी गणेशप्रसाद तिमिल्सिनाले चालू आवका चार महिनामा २२ हजार दुई सय आठ बाह्य तथा आन्तरिक पर्यटकले गोसाइँँकुण्ड र लाङटाङ क्षेत्रको भ्रमण गर्ने भनी दर्ता गरेर शुल्क तिरेको बताए । निकुञ्ज भ्रमण गर्न आउने नेपालीलाई रु. एक सय, सार्क मुलुकका पर्यटकलाई रु. एक हजार पाँच सय र अन्य देशका पर्यटकलाई रु. तीन हजार शुल्क तिर्नुपर्ने व्यवस्था छ ।

पर्यटकीय सम्भावना हुँदाहुँदै पनि स्थानीय तहले समय–समयमा पदमार्ग मर्मत र प्रचारप्रसारमा ध्यान नदिँदा रसुवावासीले पर्यटनबाट लिनुपर्ने जति लाभ लिन नसकिरहेको पर्यटन व्यवसायी शिव लामिछानेले गुनासो गरे । गोसाइँकुण्ड–४ मा पर्ने लाङटाङ र वडा नं.५ मा पर्ने सरोवर गोसाइँकुण्डलगायत सानाठुला गरी एक सयभन्दा बढी प्रकृतिनिर्मित कुण्ड जिल्लामा छन् । काठमाडौँबाट एक सय किलोमिटर दूरीमा हिमशृङ्खला देखिने उच्च स्थान रहेकाले पनि रसुवामा कम खर्चमा पदयात्राको मजा लिँदै हिमाली दृश्यको रसास्वादन गर्न सकिने चेम्बर अफ कमर्स रसुवाका अध्यक्ष सञ्जीव अमात्य बताउँछन् । पालिकाले शुल्क मात्र उठाउने, तर पर्यटकका लागि सुविधा आवश्यक भौतिक पूर्वाधार मर्मत र थप पूर्वाधारका लागि बजेट नछुट्याउने गरेको गोसाइँकुण्ड–४ का वडाध्यक्ष एवम् लाङटाङ पदमार्गका होटेल व्यवसायी ढिन्डुप जाङ्वाले गुनासो गरे । पालिकामा पदमार्ग मर्मत र पुल, झोलुङ्गे पुल निर्माणका लागि हरेक वर्ष वडाबाट प्रस्ताव लगिए पनि महत्व नदिइएको आरोप उनले लगाए । सो क्षेत्रमा आउने पर्यटक खाना र बस्नमा समेत ठगिने गरेको बताइएको छ ।