काठमाडौँ । नेपाल लाइब्रेरी फाउन्डेसन नेपाल केन्द्रीय समिति काठमाडौँले भदौ १५ गते केन्द्र, प्रदेश र स्थानीय तहहरूमा विभिन्न चेतनामूलक कार्यक्रम गरी उत्साहपूर्वक १८औँ पुस्तकालय दिवस मनाउँदै छ ।

नेपाल सरकारले हरेक वर्ष भदौ १५ गते पुस्तकालय दिवस मनाउँदै आएको छ । शिक्षा, विज्ञान तथा प्रविधि मन्त्रालयको अग्रसरतामा नेपाल लाइब्रेरी फाउन्डेसनलगायतका सङ्घ-संस्थाको सक्रियतामा सो दिवस मनाउन लागेको हो । यस वर्षको आदर्श वाक्य ‘हाम्रो पुस्तकालय, हाम्रो भविष्य’ रहेको छ । सूचना प्रविधिको तीव्र विकासँगै प्रविधिको अत्यधिक प्रयोगले सामाजिक मूल्य, मान्यता र सम्बन्धमा सङ्कुचन देखापर्न थालेको छ । पठन संस्कृति ध्वस्त हुँदै छ । मानिसमा रहेको प्रचुर सिर्जनशीलता सुस्ताउँदै गएको छ । घरमा अभिभावक र विद्यालयमा शिक्षकले किताब लिएको, हेरेको वा पढेको देख्न अब बालबालिकालाई मुस्किल हुन थालेको छ । हामी सबैको धेरै समय र सम्पत्ति मोबाइलमा खर्च हुने गरेको यथार्थ हामीलाई थाहै छ । हाम्रा भावी पुस्ता कस्तो बनाउँदै छौँ ? अब सबैले सोच्ने वेला आइसकेको छ । आजभोलि पत्रुखानाको अत्यधिक प्रयोगले बालबालिकाको शारीरिक स्वास्थ्य बिग्रँदै छ भने मोबाइलको अधिक दुरुपयोगले मस्तिष्कको क्षति भइरहेको छ । सिर्जशीलता मरिरहेको छ । अपार क्षमता भएको मानव दिमागको तेज ह्रासोन्मुख बन्दै छ । यसलाई समयमा नै विकल्पसहित रोक्न जरुरी भइसकेको छ ।

यी कुरालाई मध्यनजर राखी नेपाल लाइब्रेरी फाउन्डेसनले पठन संस्कृति  प्रर्वद्धन हेतु सञ्चालन गर्दै आएको ‘गृह पुस्तकालय अभियान’लाई पुस्तकालय सचेतना बढाउँदै सरकार र समाजको तल्लो तहसम्म पु¥याउने उद्देश्यअनुरूप सङ्घ, प्रदेश, जिल्ला र पालिकासम्म पुग्दै छ । फाउन्डेसनका बागमती प्रदेश संयोजक देवराज सिम्खडाका अनुसार ‘हामो पुस्तकालय, हाम्रो भविष्य’ आदर्श वाक्यका साथ १८औँ पुस्तकालय दिवस सातै प्रदेश र धेरै जिल्लामा विभिन्न रचनात्मक तथा चेतनामूलक कार्यक्रम गरी मनाइँदै छ । संयोजक सिम्खडा भन्छन्, ‘यो विशुद्ध सामाजिक अभियान भएकोले यसमा सबैको साथ र सहयोगको अपेक्षा गरेका छौँ ।’ नुवाकोटका जिल्ला संयोजक भेषराज रिमालका अनुसार विदुरमा, रसुवा जिल्ला संयोजक कमल आचार्यका अनुसार कालिकास्थानमा र धादिङ जिल्लाका संयोजक ध्रुव अधिकारीका अनुसार धादिङबेँसीमा पुस्तकालय दिवस मनाइँदै छ । गृह पुस्तकालय अभियानले घरघरमा अवस्था र आवश्यकताअनुसार पुस्तकालय वा पठनकक्ष स्थापना गरी पठनशील र सभ्य नागरिकको हैसियत बनाउन सबैमा अनुरोध गरेको छ ।