रसुवा । उत्तरगया गाउँपालिकाले लुम्बिनी बौद्ध विश्वविद्यालयको प्राविधिक सहयोगमा चिनियाँ भाषा (हान्यु, चोङवन) र बौद्धदर्शनमा स्नातक तहको कार्यक्रम सञ्चालन गर्ने भएको छ । ब्याचलर इन टिचिङ चाइनिज टु स्पिकर्स अफ अदर ल्याङ्ग्वेज (बिटिसिएसओएल) नाम रहेको सो कार्यक्रम बागमती प्रदेशमै पहिलोपटक सञ्चालन हुन लागेको हो । उत्तरगया-५ स्थित नीलकण्ठ माध्यमिक विद्यालय, बोगटीटारमा सञ्चालन हुने सो कार्यक्रमले हान्यु सिकाउने र बौद्धदर्शनमा गहिरो अध्ययन गराउने उद्देश्य राखेको छ ।

कार्यक्रममा भर्ना हुनका लागि विद्यार्थीले कक्षा १२ उत्तीर्ण गरेको हुनुपर्नेछ । चोङवनका विशेषज्ञ र बौद्धदर्शनका अध्यापकले विद्यार्थीलाई व्यावहारिक ज्ञान प्रदान गर्नेछन् । विद्यार्थीलाई छात्रवृत्ति र अन्य सुविधा पनि उपलब्ध गराइनेछ । आर्थिक रूपमा कमजोर, तर उत्कृष्ट विद्यार्थीलाई विशेष प्राथमिकता दिइनेछ । सो कार्यक्रमले नेपाल र चीनबिचको सम्बन्धलाई थप मजबुत बनाउन मद्दत गर्ने जनाइएको छ । चिनियाँ भाषा र बौद्धदर्शन दुवैलाई एकैसाथ समेटेर सञ्चालन हुने यो कार्यक्रमले दुवै देशबिचको सांस्कृतिक आदान-प्रदानलाई प्रर्वद्धन गर्ने विश्वास पनि व्यक्त गरिएको छ । त्यससम्बन्धी सम्झौता गत सोमबार लुम्बिनीमा सम्पन्न भएको हो । विश्वविद्यालयका कुलपति प्राडा सुवर्णलाल बज्राचार्यले भन्नुभयो, ‘यो कार्यक्रमले नेपाल र चीनबिचको सांस्कृतिक र शैक्षिक सम्बन्धलाई थप मजबुत बनाउने छ । विद्यार्थीले चिनियाँ भाषा र बौद्धदर्शन एकैसाथ अध्ययन गर्न पाउने अवसर पाउनु निकै खुसीको कुरा हो ।’ गाउँपालिकाका अध्यक्ष माधव अर्यालले मित्रराष्ट्र चीनको सिमाना रसुवा जिल्ला रहेको यस भेगका धेरै मानिस केरुङ जाने अवस्था बढिरहेकाले गाउँपालिकामा यस्तो अन्तर्राष्ट्रियस्तरको कार्यक्रम सञ्चालन हुनु गौरवको कुरा भएको जनाउँदै यसले सो क्षेत्रका विद्यार्थीलाई गुणस्तरीय शिक्षा प्राप्त गर्न मद्दत गर्ने र भविष्यमा रोजगारीका अवसर पनि सिर्जना हुने विश्वास व्यक्त गर्नुभयो ।

नीलकण्ठ माविका प्रधानाध्यापक माधव लामिछानेले सोका लागि विद्यालयले आवश्यक पूर्वाधार तयार पारिसकेको तथा न्यूनतम २० र अधिकतम ४० विद्यार्थीलाई अध्यापन गराइने योजना रहेको जानकारी दिनुभयो । लुम्बिनी बौद्ध विश्वविद्यालयका रजिस्ट्रार डा.तिलकराम आचार्यले सो कार्यक्रम चारवर्षे स्नातक तहको हुने र त्यसमा पहिलो दुई वर्षमा भाषाको आधारभूत ज्ञान दिइने तथा अर्को दुई वर्षमा बौद्धदर्शन र चिनियाँ भाषा शिक्षण पद्धतिमा विशेष ध्यान केन्द्रित गरिने बताउनुभयो । गाउँपालिकाका प्रमुख प्रशासकीय अधिकृत होमनाथ दाहालले भन्नुभयो, ‘हाम्रो पालिकामा यस्तो उच्चस्तरीय शैक्षिक संस्थाबाट कार्यक्रम सञ्चालन हुनु निकै गौरवको कुरा हो । हामी विद्यालयलाई आवश्यक सहयोग गर्ने छौँ र स्थानीय विद्यार्थीलाई यो अवसरबाट वञ्चित हुन नदिने प्रयास गर्नेछौँ ।’