काठमाडौं । होटेल तथा पर्यटन व्यवसायी सङ्घ नेपाल बागमती प्रदेशको छैटौँ साधारणसभा सम्पन्न भएको छ । सिन्धुपाल्चोकको पर्यटकीय क्षेत्र सुकुटेमा आइतबार र सोमबार साधारणसभा सम्पन्न भएको हो । सिन्धु सुकुटे पर्यटन व्यवसायी सङ्घको सहआयोजनामा सम्पन्न साधारणसभाको उद्घाटन होटेल व्यवसायी महासङ्घ नेपालका केन्द्रीय अध्यक्ष दिनेशकुमार चुकेले गर्नुभएको थियो ।

साधारणसभामा प्रदेशभरिका नुवाकोट जिल्ला सङ्घसहित उल्लेख्य सङ्ख्यामा प्रतिनिधि र पर्यवेक्षक उपस्थित रहेका थिए । बागमतीअन्तर्गतका १३ वटै जिल्लाका होटेल तथा पर्यटन व्यवसायीको सहभागिता रहेको साधारणसभामा वर्तमान अवस्थामा सिङ्गो पर्यटन व्यवसायले भोगिरहनुपरेका चुनौती, अवसर र सम्भावनाबारे छलफल भएको थियो । साधारणसभामा सहभागीले नेपाल प्राकृतिक, सांस्कृतिक, ऐतिहासिक तथा भौगोलिक विविधताले भरिपूर्ण मुलुक भए पनि पर्यटन क्षेत्रको विकास हुन नसकेको गुनासो गरेका थिए । देशमा आइपर्ने दैवी–प्रकोपदेखि राजनीतिक आन्दोलनसमेतमा होटेल तथा पर्यटन व्यवसाय प्रभावित हुने गरेको उनीहरूको भनाइ थियो । सभामा सङ्घले पर्यटन क्षेत्रको विकासका लागि निजी क्षेत्रको भूमिकालाई अझ बढी सशक्त बनाउँदै राज्यका सरोकारवाला निकायसँगको सहकार्यमा व्यावसायिक मर्यादा, गुणस्तर र सेवामा सुधार गर्दै अगाडि बढ्ने प्रतिबद्धता व्यक्त गरेको छ ।