समुन्द्रटार । नुवाकोट जिल्ला, दुप्चेश्वर गाउँपालिका आयोजक र दुप्चेश्वर क्षेत्र विकास कोष सहआयोजक रहेको सातौँ दुप्चेश्वर कप राष्ट्रव्यापी अन्तरस्थानीय तहस्तरीय खुला पुरुष भलिबल प्रतियोगिताको उपाधि चापाकोट नगरपालिका स्याङ्जाको पोल्टामा परेको छ । वैशाख २ देखि ५ गतेसम्म दुप्चेश्वर मन्दिरपरिसर रामतीमा भएको प्रतियोगितामा नुवाकोटका पाँच र बाहिर जिल्लाका पाँच गरी सहभागी दश टिममध्ये शुक्लागण्डकी नगरपालिका तनहुँ दोस्रो, आयोजक दुप्चेश्वर गाउँपालिका तेस्रो र पञ्चकन्या गाउँपालिका चौथो भएका छन् ।

प्रतियोगितामा प्रथम हुने टिमलाई नगद तीन लाख ३३ हजार तीन सय ३३, द्वितीय हुनेलाई दुई लाख २२ हजार दुई सय २२, तृतीय हुनेलाई एक लाख ११ हजार एक सय ११ र सान्त्वना पुरस्कार ५५ हजार पाँच सय ५५ नगदसहित सिल्ड, मेडल र प्रमाणपत्र समापनको दिन आयोजक दुप्चेश्वर गाउँपालिकाका अध्यक्ष शंकर थापाले प्रदान गर्नुभएको थियो । प्रतियोगिताको उद्घाटन जिल्ला समन्वय समिति नुवाकोटका प्रमुख रजिन्द्रविक्रमसिंह ठकुरीले गर्नुभएको थियो । खेलकुदको माध्यमबाट सामाजिक सद्भाव र स्थानीय प्रतिभा प्रस्फुटन गर्ने तथा दुप्चेश्वर मन्दिरपरिसरमा रहेको सार्वजनिक जग्गाको संरक्षण गर्ने उद्देश्यका साथ प्रतियोगिता गरिएको अध्यक्ष थापाले बताउनुभयो ।