विदुर । नेपाल उद्योग वाणिज्य महासंघको अघिल्लो मंगलबार सम्पन्न निर्वाचनबाट जिल्ला नगर खुलातर्फबाट विजयी नुवाकोटका दुई व्यवसायीलाई नुवाकोट उद्योग वाणिज्य सङ्घले सोमबार स्वागत तथा सम्मान गरेको छ । जिल्ला नगर खुलातर्फको नतिजामा १५ जना विजयी भएका छन् ।

महासङ्घको कार्यसमितिका लागि भएको निर्वाचनमा एक सय २९ मतबाट जिल्ला नगरतर्फबाट केन्द्रीय सदस्यमा नुवाकोट उद्योग वाणिज्य संघका निवर्तमान अध्यक्ष, महासङ्घका निवर्तमान कार्यसमितिका सदस्य एवं जिल्ला परिषद्का निवर्तमान उपसभापति ताराबहादुर कार्की र जिल्ला नगरका महिला सदस्यतर्फ सङ्घका पूर्ववरिष्ठ उपाध्यक्ष गीता अमात्य निर्वाचित हुनुभयो । मतगणनाको अन्तिम परिणामानुसार कार्की ९० र अमात्य ८१ मत प्राप्त गरी विजयी हुनुभएको हो । महासङ्घका केन्द्रीय सदस्यमा कार्की दोस्रो कार्यकाल र अमात्य पहिलो कार्यकालका लागि निर्वाचित हुनुभएको छ । उहाँहरूको सम्मान र स्वागतमा सङ्घले गरेको कार्यक्रममा सङ्घका अध्यक्ष राजेन्द्र श्रेष्ठ, पूर्वाध्यक्ष शरण उत्सुक र द्वितीय उपाध्यक्ष सबिन राजभण्डारीले व्यवसायीका पक्षमा काम गर्न सुझाव दिनुभएको थियो ।