+
Search

ताजा अपडेट +

पपुलर +

ट्राफिक प्रहरी सक्रिय : कारबाहीबाट रू.१५ लाख राजस्व सङ्कलन

ट्राफिक प्रहरी सक्रिय : कारबाहीबाट रू.१५ लाख राजस्व सङ्कलन
सरस्वती न्यौपाने
६ महिना अगाडी

धुन्चे । रसुवा जिल्लामा सवारी दुर्घटना न्यूनीकरण तथा सडक अनुशासन कायम गर्ने उद्देश्यले ट्राफिक प्रहरीले पछिल्लो समय कामलाई तीव्रता दिइरहेको छ । विशेषगरी चीनको केरुङ हुँदै रसुवागढी नाकामा सामान आयात तथा निर्यातका लागि आवतजावत गर्ने सवारीसाधनलाई लक्षित गर्दै ट्राफिकले निगरानी र कारबाही तीव्र बनाइरहेको छ ।

Utsuk Books & Stationery
Satkar Machinery Center

जिल्ला ट्राफिक प्रहरी कार्यालयका इन्चार्ज जलन्धर राय यादवका अनुसार चालू आर्थिक वर्षको साउन महिनादेखि हालसम्म ट्राफिक नियम उल्लङ्घन गर्ने एक हजार एक सय ९८ सवारीसाधनमाथि कारबाही गरिएको छ । नियमविपरीत सञ्चालन भएका सवारीसाधनलाई कसुरका आधारमा तत्काल जरिवाना तोकी चालकबाटै राजस्व खातामा रकम दाखिला गराउने व्यवस्था लागू गरिएको छ । यो अवधिमा कारबाहीमार्फत रु.१४ लाख ९१ हजार पाँच सय राजस्व सङ्कलन भएको छ । यस अवधिमा जिल्लाभित्र ७६ वटा सवारी दुर्घटना हुँदा तीन बालबालिकासहित ४५ जना घाइते र तीनजनाको ज्यान गएको ट्राफिक प्रहरीका अभिलेखकर्ता विकास तामाङले जानकारी दिनुभयो । दुर्घटनामा परेका सवारीसाधनमध्ये सामान बोकेका पाँच सय ८४ ट्रक तथा कन्टेनर, ५३ वटा बस र केही जिप, कार एवम् मोटरसाइकलसमेत रहेका छन् ।

Suzuki New Bike & Scooter

ट्राफिक प्रहरीका अनुसार पछिल्लो समय दुर्घटनाको प्रमुख कारण चालकले मादक पदार्थ तथा लागुपदार्थ सेवन गरी सवारी सञ्चालन गर्दा भएको पाइएको छ । मापसे (मादक पदार्थ सेवन) र लापसे (लागुपदार्थ सेवन) परीक्षण गर्ने आधुनिक उपकरण प्राप्त भएपछि परीक्षण कार्यलाई अझ प्रभावकारी बनाइएको छ । हालसम्मको परीक्षणमा लागू पदार्थ सेवन गर्ने ११ जना र मादक पदार्थ सेवन गर्ने दुईजनालाई नियन्त्रणमा लिई कानुनी प्रक्रिया अघि बढाइएको छ । सडक सुरक्षालाई केवल कारबाही मात्र नभई, जनचेतनामार्फत पनि सुदृढ बनाउन ट्राफिक प्रहरीले निरन्तर अभियान सञ्चालन गरिरहेको छ । विद्यालयका विद्यार्थी, सवारीचालक तथा सहचालकलाई लक्षित गरी हालसम्म दुई सय ४९ पटक जनचेतनामूलक कार्यक्रम सञ्चालन गरिएको छ, जसमा १४ हजार सात सय २८ जनाको सहभागिता रहेको जनाइएको छ ।

ट्राफिक सेवाको इतिहास र विकास
रसुवागढी नाका सञ्चालनसँगै अन्तर्राष्ट्रिय व्यापार विस्तार भएपछि जिल्लामा सवारी चाप उल्लेखनीय रूपमा बढ्न थालेको थियो । यही आवश्यकता महसुस गर्दै सीमित जनशक्ति र न्यून स्रोतसाधनबिच रसुवामा ट्राफिक प्रहरी सेवाको स्थापना गरिएको थियो । प्रारम्भिक चरणमा केही प्रहरी कर्मचारीबाट सुरु गरिएको ट्राफिक व्यवस्थापन अहिले व्यवस्थित संरचना, नियमित अनुगमन, प्रविधिमैत्री परीक्षण प्रणाली तथा जनचेतनामूलक कार्यक्रममार्फत सशक्त बन्दै गएको छ । पहाडी भौगोलिक अवस्था, साँघुरा सडक, मौसमजन्य जोखिम र बढ्दो व्यापारिक यातायातका चुनौतीबिच ट्राफिक प्रहरीले निरन्तर सेवा दिँदै आएको छ । सीमित साधनस्रोत हुँदाहुँदै पनि दुर्घटना नियन्त्रण, सुरक्षित यात्रा प्रवद्धन र नियमपालनमा ट्राफिक प्रहरीको सक्रियता प्रशंसनीय रहेको स्थानीय नागरिक बताउँछन् ।

नागरिकमा चिन्ता, ट्राफिकको सक्रियता
सवारीचालकले मादक पदार्थ तथा लागुपदार्थ सेवन गरी सवारी चलाउने प्रवृत्ति बढ्न थालेपछि आमनागरिक तथा नागरिक समाजले चिन्ता व्यक्त गरेका छन् । यद्यपि, ट्राफिक प्रहरीले कारबाहीसँगै सचेतनामूलक अभियानलाई निरन्तरता दिएकाले सडक सुरक्षा सुधार हुने अपेक्षा गरिएको छ । ट्राफिक प्रहरीका अनुसार ‘सुरक्षित यात्रा, अनुशासित चालक र जिम्मेवार नागरिक’ निर्माण गर्नु नै मुख्य लक्ष्य रहेको छ । बढ्दो जिम्मेवारीबिच ट्राफिक प्रहरीको मनोबल उच्च राख्दै आधुनिक प्रविधि, जनशक्ति र पूर्वाधार थप सुदृढ गर्न सके रसुवामा सडक दुर्घटना उल्लेखनीय रूपमा घट्ने नागरिक समाजले विश्वास लिएको छ ।

भुतपूर्व सैनिक सम्मेलन-२०८३ सम्बन्धी सूचना

प्रतिक्रिया

लेखकको बारेमा

सरस्वती न्यौपाने