धुन्चे । गत वर्ष असार २४ गते चिनियाँ भू-भाग ल्हेन्दे खोलामा आएको बाढीले क्षति पुर्याएको रसुवा जिल्ला, उत्तरगया गाउँपालिकाको बेत्रेगौँडा सिँचाइ आयोजना लिफ्ट प्रणालीमार्फत पुनः सञ्चालनमा आएपछि पालिकाका किसान लाभान्वित भएका छन् । गाउँपालिकामा लिफ्ट प्रणालीमार्फत सिँचाइ सुविधा विस्तार भएपछि कृषक उत्साहित भएको डिभिजन सिँचाइ कार्यालय रसुवाका प्रमुख सुभाष बानियाँले बताउनुभयो ।

सिँचाइ कार्यालयका प्रमुख बानियाँका अनुसार जिल्लाका चार हजार सात सय ३८.४० हेक्टर जमिनमा सिँचाइ सुविधा पुर्याउने लक्ष्य राखिए तापनि अहिलेसम्म तीन हजार सात सय ३१ हेक्टरमा मात्रै सिँचाइ पुगेको छ भने तीन हजार कृषकले सिँचाइ सुविधा उपभोग गरिरहेका छन् । उत्तरगया-५ स्थित त्रिशूली नदी, मुहान गरी खनिएको बेत्रेगौँडा, पैहिरेबेँसी, कैदलटार सिँचाइ आयोजना गत वर्षको बाढीका कारण अवरुद्ध भएपछि निर्माणाधीन ३७.३ मेगावाट क्षमताको माथिल्लो त्रिशूली ३ ‘बी’ जलविद्युत् आयोजनाले पानी तान्ने उपकरण उपलब्ध गराएको थियो । बाढीले करिब तीन सयभन्दा बढी भू-भाग क्षति पुर्याएको विवरण डिभिजन सिँचाइ कार्यालयले सङ्कलन गरी सार्वजनिक गरेको थियो । लामो समयसम्म अवरुद्घ सिँचाइ पुनः सञ्चालनमा आएपछि स्थानीय कृषक श्यामबहादुर गुरुङले आयोजनाले विगतदेखि स्थानीय कृषकलाई सिँचाइ सुविधा उपलब्ध गराई खाद्यान्नमा आत्मनिर्भर बनाएको स्मरण गर्नुभयो । उत्तरगया-४ का अध्यक्ष अम्मरबहादुर बुलुनका अनुसार जलविद्युत् आयोजनाले उपलब्ध गराएको उपकरणको सहायताले हजारौँ रोपनी खेतीयोग्य जमिनमा सिँचाइ सुविधा पुगेको छ । नेपालमा आधुनिक सिँचाइ प्रणालीको विकास विसं २०३० को दशकदेखि विभिन्न सरकारी तथा अन्तर्राष्ट्रिय सहयोगमा ग्रामीण विकास परियोजनामार्फत सुरु भएको हो । सिँचाइको भरपर्दो व्यवस्थाले उत्पादन वृद्धि हुनुका साथै किसानमा उत्साह थपिएसँगै हिउँदमा मकै, गहुँ, तोरी तथा धान खेती गर्न सहज भएको वडाध्यक्ष बुलुनले बताउनुभयो ।