टिमुरे । रसुवा जिल्ला, गोसाईँकुण्ड-२, टिमुरेमा रहेको रसुवा भन्सार कार्यालय, जिल्ला प्रहरी कार्यालय र सशस्त्र प्रहरी बलले चालू आवको साउनदेखि चैत मसान्तसम्म राजस्व चुहावट नियन्त्रण अभियानअन्तर्गत अवैध सामग्री जफतबाट करिब रू.तीन करोड ५१ लाख ७६ हजार चार सय २० राजस्व सङ्कलन गरेको छ ।

सशस्त्र प्रहरी बल २० नम्बर गुल्मले २३, जिल्ला प्रहरी कार्यालयले १९, रसुवा भन्सार कार्यालयले चालू आवको नौ महिनामा १५ पटक विभिन्न स्थानमा चेकजाँच गर्ने क्रममा विभिन्न प्रकारका सामान समातेको थियो । समातेका सामानमा चकलेट, चाउमिनमा प्रयोग गरिने सस, अचार, रोल कपडा, तयारी पोसाक, बालबालिकाको खेलौना, कफी, थर्मस, भेप तथा चुरोट रहेको बताइएको छ । समातिएका सामान ८० प्रतिशत भन्दा बढी खाद्य उपभोग्य वस्तु रहेको रसुवा भन्सार कार्यालयका सूचना अधिकारी करवीर गैह्रेले जानकारी दिनुभयो । प्रहरीको गस्ती, सवारी साधन चेकजाँच तथा प्राप्त सूचनाको आधारमा भेटिएका अवैध सामग्री नियन्त्रणमा लिएर रसुवा भन्सारमा बुझाउने कामलाई कडा गरिएको जिल्ला प्रहरी कार्यालय रसुवाका प्रहरी उपरीक्षक अशोक थापाले बताउनुभयो । राजस्व चुहावट नियन्त्रण तथा अवैध आयात रोक्न सुरक्षा निकाय र भन्सार कार्यालयले संयुक्त अनुगमन तथा जाँचलाई प्रभावकारी बनाएको छ ।

प्रनाउ थापाका अनुसार आमाछोदिङ्मो गाउँपालिकाको एम्बुलेन्सचालकले बिरामी ओसार्ने एम्बुलेन्समा चिनियाँ चुरोट लुकाएर ओसार-पसार गरिएको घटना तथा क्रियाकलाप गरेको भेटपछि चालकलाई चैत ६ गते बेत्रावतीबाट प्रहरीले पक्राउ गरेको थियो र पछि कानुनी प्रक्रिया पूरा गरेपछि चालकलाई घरौटीमा रिहा गरी एम्बुलेन्स सम्बन्धित पालिकालाई बुझाइएको छ ।