लाङटाङको चिज गोदाममै सड्दै

  • त्रिशूली प्रवाह
  • २ पुष २०७७, बिहीबार १५:२८
  • सरस्वती न्यौपाने

धुन्चे, नेपालकै जेठो चिज कारखाना लाङटाङ चिज उत्पादन केन्द्रले उत्पादन गरेको चिज (कोभिड-१९) को सङ्क्रमण सुरु भएपछि बिक्री नहुँदा गोदाममै बिग्रिने अवस्थामा पुगेको छ ।
चिज केन्द्रका प्रमुख ग्याल्पो तामाङले बताएअनुसार चार सय चौँरीगाईबाट उत्पादन हुने दूध आपूर्ति गर्ने किसानको सङ्ख्या २१ रहेको र चिज तथा मखन बिक्री कम हुन थालेपछि गत असोज १५ बाटै चिज उत्पादन बन्द गरिएको छ ।

      गत जेठ मसान्तबाट भदौ १५ सम्म उत्पादन भएको पाँच लाख १२ हजार रुपैयाँको चिज तथा एक लाख आठ हजार रुपैयाँको मखन अहिले बिक्री गर्न नसक्दा बिग्रिने अवस्थामा पुगेको उनले बताए । केन्द्र प्रमुख तामाङका अनुसार नेपालकै तेस्रो पर्यटकीय गन्तव्यको रूपमा परिचित लाङटाङमा आन्तरिक तथा बाह्य पर्यटकको आगमन ठप्प भएपछि लाङटाङको क्याङजेनमा उत्पादन भएको चिज बिक्री नहुँदा र भण्डारणमा लामो समयसम्म एकै ठाउँमा मात्र राख्दा तौल घट्न गई त्यसको स्वाद र तौल नोक्सानी भइरहेको जानकारी दुग्ध विकास संस्थान लैनचौर काठमाडौंमा गराएको उनले बताए । समयमै स्थानीयस्तरमा बिक्री हुन नसक्दा र ढुवानी गरी काठमाडौं लान नसक्दा आफूले नै नोक्सानी व्यहोर्नुपर्ने अवस्था आएकोसमेत उनले बताए ।