नेकपा नुवाकोटका बहुमत नेता प्रचण्ड–माधव पक्षमा

बट्टार, नेपाल कम्युनिस्ट पार्टी (नेकपा) केन्द्रमा विधिवत् विभाजन कुरेर बसेको भए पनि नुवाकोटमा रहेका प्रदेश, जिल्ला, नगर तथा गाउँ कमिटीका बहुमत नेता पुष्पकमल दाहाल प्रचण्ड–माधवकुमार नेपाल समूहमा लागेका छन् । आइतबार बट्टारमा भएको नेकपा नुवाकोटको जिल्ला भेला तथा प्रशिक्षण कार्यक्रममा भएको हस्ताक्षरअनुसार एक सय ६० जनाको जिल्ला कमिटी सदस्यमध्ये एक सय ३४ जनाले प्रचण्ड–नेपाललाई साथ दिने प्रतिबद्धता जनाएका छन् ।

      नुवाकोट नेकपाको एक सय ६० जना जिल्ला सदस्यमा एक सय ३४ जना आइतबार सहभागी भएर प्रधानमन्त्री केपी ओलीको असंवैधानिक कदमको विरोध गरेका छन् । २६ जना जिल्ला कमिटी सदस्य उक्त भेलामा उपस्थित भएनन् । नेकपा नुवाकोटका सचिव नारायणप्रसाद खतिवडाले दिएको जानकारीअनुसार नुवाकोटको १२ वटै स्थानीय तहमा पुस १६ गते बिहीबार विरोध कार्यक्रम र कार्यकर्ता भेलाको आयोजना गरिएको छ । कार्यक्रमको नेतृत्व र व्यवस्थापनका लागि नेकपा बागमती प्रदेशका १२ जना सदस्यलाई तोकिएको छ । यस्तै, नुवाकोट जिल्लामा नेकपाबाट निर्वाचित वडाध्यक्षहरूमा ३५ भन्दा बढीले आइतबारको कार्यक्रममा सहभागिता जनाएका छन् । ८८ वटा वडा रहेको नुवाकोटमा ५१ वटा वडामा नेकपाले अध्यक्ष जितेको छ । प्रधानमन्त्री ओली पक्षमा बढीमा १५ जना वडाध्यक्ष रहेकोसमेत पार्टी सचिव खतिवडाले बताए । नेकपा नुवाकोटको जिल्ला भेलालाई सम्बोधन गर्दैै नेकपाका बागमती प्रदेशका सहइन्चार्ज हितबहादुर तामाङले प्रधानमन्त्री केपी शर्मा ओलीको असंवैधानिक कदमलाई जनस्तरबाट विरोध गर्नुपर्ने बताए । पार्टी एकता र पार्टीले लिएका मूल्य–मान्यतालाई समेत केपी शर्मा ओलीले निजी स्वार्थमा प्रयोग गरेको उनको भनाइ छ । सुरुवाती दिनबाट नै आफूअनुकूल र शङ्कास्पद अभिव्यक्ति दिँदै आएको आरोप उनले लगाए ।

      कार्यक्रममा नेकपाका केन्द्रीय सदस्य विमला सुवेदीले वर्तमान सरकारविरुद्ध नागरिक समाजसमेत सडकमा उत्रिएको बताइन् । रगत र पसिनाले प्राप्त भएको सङ्घीय लोकतान्त्रिक गणतन्त्रलाई लत्याउँदै प्रधानमन्त्री ओलीले गैरसंवैधानिक र अलोकतान्त्रिक कदम चालेको उनको भनाइ छ । कार्यक्रममा सहभागी भएका वक्ताहरूले नागरिकले दिएको जनमतको कदर गर्न नसकी प्रधानमन्त्री ओली संसद् विघटनतर्फ लाग्नु सोचनीय विषय रहेको बताएका छन् । बाहिरी शक्तिसँगको साँठगाँठका कारण वर्तमान सरकार चुकेको सहभागीले बताएका छन् । प्रशिक्षण कार्यक्रमका प्रमुख अतिथि केन्द्रीय सदस्य बेदुराम भुसालले संसद् विघटनसम्बन्धी सर्वाेच्चमा परेको रिटको संवैधानिक इजलासले उल्ट्याउनुको विकल्प नरहेको बताए । दुईतिहाइ बहुमत प्राप्त सरकारले विकास निर्माण र समृद्ध मुलुकको परिकल्पना गर्नुपर्नेमा संसद् विघटन गर्दै जनमतको अपहेलना गर्नु लोकतन्त्रमाथिको प्रहार रहेको उनको भनाइ छ ।

      पार्टीका सबै कमिटी र संसदीय दलमा समेत अल्पमतमा परेपछि प्रधानमन्त्री ओलीले विधि-विधानविपरीत संसद् विघटन गरेको नेकपा नुवाकोटका जिल्ला अध्यक्ष हिरानाथ खतिवडाले बताए । प्रधानमन्त्रीको कदमको विपक्षमा ओली समूहकै धेरै नेता रहेको अध्यक्ष खतिवडाको भनाइ छ । संसद् विघटनविरुद्ध अदालतमा मुद्दा परिसकेकोले संसद् पुनस्र्थापना हुनेमा विश्वस्त रहन उनले कार्यकर्तालाई आग्रह गरे । भेलामा जिल्लाका दुई सयभन्दा बढी अगुवा कार्यकर्ता उपस्थित भएका थिए । पुस १४ देखि ३० गतेसम्म सङ्घर्षका कार्यक्रम गर्ने र त्यसलाई वडा तहसम्म लैजाने निर्णय भएको उनले जानकारी दिए । पार्टी विभाजनपछि जिल्लाका अधिकांश नेता नेकपा दाहाल-नेपाल समूहमा देखिएका छन् । बागमती प्रदेश कमिटीमा रहेका नुवाकोटका १८ जना नेतामध्ये १२ जना दाहाल-नेपाल समूहमा खुलेर लागेका छन् । जिल्ला कमिटीका सचिवालय सदस्य ६२ जनामध्ये ४३ जना र कार्यालय टिमका सातजनामध्ये ६ जना नेता पनि दाहाल-नेपाल समूहमा खुलेर प्रधानमन्त्री ओलीको कदमको विरुद्ध लागेका छन् ।