बट्टार सहकारीको वनभोजमा अन्तक्रिया

बट्टार, नुवाकोट जिल्लामा रहेका सहकारी संस्थामध्येको धेरै सेयर सदस्य भएको विदुर नगरपालिका–४ मा रहेको बट्टार सहकारी संस्था लि.को शनिबार बृहत् वनभोज तथा सहकारीको विषयमा अन्तक्रिया सम्पन्न भएको छ ।

सहकारीले हरेक वर्ष सेयर सदस्यबीच अन्तक्रिया र बृहत् वनभोज तथा परिचयात्मक कार्यक्रम गर्ने गरेको छ । ०५३ सालमा स्थापना भई सञ्चालनमा रहेको सहकारीले शनिबार बेलकोटगढी नगरपालिकाको काशीटारको त्रिशूलीबगरमा सम्पन्न वनभोज कार्यक्रममा सहकारीका अध्यक्ष टलकमान श्रेष्ठले सहकारीको समग्र गतिविधिबारे विस्तृत जानकारी गराए । सञ्चालक सदस्य राजकुमार आचार्यले सञ्चालन गरेको कार्यक्रममा सहकारीकी उपाध्यक्ष मेनुका श्रेष्ठले स्वागतसहित कार्यक्रमको उद्देश्यमाथि प्रकाश पारेकी थिइन् । सहकारीका सल्लाहकार मोहन खड्का, निवर्तमान अध्यक्ष ओमप्रकाश श्रेष्ठ, पूर्वअध्यक्ष धर्मभक्त श्रेष्ठ, कानुनी सल्लाहकार द्वारिकाप्रसाद पाण्डेलगायतले सहकारीको महत्व र आवश्यकताबारे बोलेका थिए । सो कार्यक्रममा लेखा समितिका संयोजक नवराज न्यौपानेले वित्तीय विवरण प्रस्तुत गरेको व्यवस्थापक हरिप्रसाद जोशीले जानकारी दिए । सहकारीमा चार सय ९६ जना सेयर सदस्य र २१ सय साधारण सेयर सदस्य रहेका छन् । अन्तक्र्रिया कार्यक्रममा सहकारीका सेयर सदस्यले सहकारीले गरिरहेको कारोबारको अवस्था र सञ्चालनबारे प्रश्न सोधेका थिए । सेयर सदस्यको प्रश्नको जवाफ अध्यक्ष टलकमान श्रेष्ठले दिएका थिए ।