बेत्रावती, रसुवा जिल्लाको उत्तरगया गाउँपालिका वडा नम्बर–५ बेत्रावतीमा नालीको ब्यवस्थापन राम्रो नहुँदा आइतबार साँझ आएको अत्याधिक पानीका कारण बाल भत्किएपछि घरभित्र भल पस्दा करिव १३ लाख बराबरको क्षति भएको छ ।
बेत्रावतीको स्थानीय रन्जना थापाको घर रहेको र करिव १५ देखि २५ मिनेटसम्म परेको पानीले पासाङल्हामु मार्गको नाली हुँदै आएको भल पानी र अन्य ठाउँबाट मिसिएर आएको लेदो पानीले निलकण्ठ मा.वि. बोगटीटारकी शिक्षिका समेत रहनुभएकी थापाको घरमा क्षति पु¥याएको हो । थापाको घरमा रहेको पर्खाल भत्किएको छ भने लगाएको ग्याबिन तार समेत बगाएको बताउँदै खानेपानी तथा आँगन समेत पुरिंदा करिव १३ लाखको क्षति भएको बताईएको छ । गल्छी–त्रिशूली–मैलुङ–स्याफ्रुवेशी–रसुवागढी सडक निर्माण भईरहेको र सो क्षेत्रमा सडकको काम समयमै सम्पन्न नगरीदिंदा स्थानीय जनताले ठूलो सास्ती र क्षति ब्यहोरीरहनुपरेको छ । गल्छी–त्रिशूली–मैलुङ–स्याफ्रुवेशी–रसुवागढी सडक योजना र ठेकेदारको लापरबाहीले गर्दा पानी जाने नाली ब्यवस्थापन हुन नसक्दा यस्तो क्षति ब्यहोर्नुपरेको स्थानीय समाजसेवी गणेश श्रेष्ठले बताउनु भयो । यस्तो क्षति जो कोहीको हुन सक्छ र यस घटनाले स्थानीयमा एक प्रकारको भय र त्रास भईरहेको उनले बताए ।
