बिचरा कर्मचारीले गत हप्ता मनाइएको संविधान दिवसको बिदा सरकारको जङ्गे उर्दीले अमिलो मनले उपयोग गर्नुपर्यो। औपचारिक रूपमा मनाइएको दिवस जनस्तरसम्म पुग्न नसकेको तेस्रो आँखाले चाल नपाउने कुरै भएन । सरकारले धुमधामसित देश–विदेशमा रहेका नेपालीलाई समेत दिवस मनाउन आह्वान गरे पनि हाम्रो न्वाँकोटमा दलका नेतालाई के फुर्सद हुन्थ्यो ? संविधानविरोधी आवाज निस्तेज पार्ने सोचले दिवसको कार्जेक्रमलाई विकेन्द्रीकरण गर्ने भनेर यसपटक गाउँ पुर्याउने क्रान्तिकारी निर्णय गर्नेहरू नै ठाउँमा नपुग्दा सिडियो सा’ब जिल्ल परे । अरूलाई मतलब नभए पनि यही संविधानले गर्दा भत्ता खान पाएका झन्डै पाँच सय जनप्रतिनिधि भनाउँदासमेत उपस्थित नभएकाले समन्वय प्रमुखज्यू पुर्पुरामा हात राखेर बसिरहेको त्रिनेत्रले देखिहाल्यो ।