धादिङबेँसी । धादिङ जिल्लाभित्र पर्ने मध्यपहाडी लोकमार्गखण्डको त्रिपुरासुन्दरी गाउँपालिकास्थित खहरेको आँखु खोलामा नौ वर्षपछि बल्ल बेलिब्रिज सञ्चालनमा आएको छ ।
०७२ सालदेखि सो स्थानमा पक्की मोटरेबल पुल निर्माण सुरु गरेको भए पनि निर्माणकार्य पूरा नभएपछि अहिले सडक विभागअन्तर्गतको मध्यपहाडी लोकमार्ग आयोजनाले बेलिब्रिज जडान गरी यातायात सञ्चालन गरेको हो । बेलिब्रिज सञ्चालनमा आएसँगै उत्तरी धादिङका विभिन्न स्थानसम्म आवत–जावतमा समेत निकै सहज हुने भएको त्रिपुरासुन्दरी गाउँपालिकाका अध्यक्ष राजु उप्रेतीले बताए । गाउँपालिकाको खहरेबजार र अचनेटार जोड्न आँखु खोलामा बेलिब्रिज जडान भएसँगै अब मध्यपहाडी लोकमार्ग हुँदै सवारीका साधन उत्तरी धादिङका सबै गाउँमा पुग्न सहज भएको अध्यक्ष उप्रेतीले जानकारी दिए । निर्माण सुरु भएको नौ वर्षपछि पक्की पुल नभए पनि मोटरेबल बेलिब्रिज जडान भई सञ्चालन सुरु भएसँगै सो क्षेत्रका स्थानीय खुसी भएको वडा नम्बर ७ का अध्यक्ष सुभास अधिकारीले बताए । पुल निर्माणले यस क्षेत्रका मानिसको आर्थिक क्षेत्रमा समेत टेवा पुग्ने दाबी उनको छ । पुल नहुँदा सो क्षेत्रका स्थानीयलाई आँखु खोला वारपार गर्न जीर्ण झोलुङ्गे पुलको प्रयोग गर्नुपर्ने बाध्यता थियो । सडक सुविधा भए पनि अचनेटार, लपांगल र उत्तरी धादिङका गाउँका स्थानमा सवारीका साधन आँखु खोला तरेर आवतजावत गर्न नसक्दा स्थानीयले बोकेर बजारबाट दैनिक उपभोग्य सरसामान ल्याउनुपर्ने बाध्यता थियो । अब भने सो समस्या पनि समाधान भएको वडाध्यक्ष अधिकारीले बताए ।
पुल सञ्चालनमा आएसँगै स्थानीय बालबालिकालाई विद्यालय आउन जानसमेत सजिलो भएको छ । यसका साथै धादिङमा उत्पादित कृषि र पशुजन्य उत्पादन बिक्रीका लागि बजार ल्याउन पनि पुलले सजिलो भएको छ । सो पुलले मध्यपहाडी लोकमार्ग हुँदै उत्तरी धादिङबाट नुवाकोट हुँदै राजधानी काठमाडौँसम्म जानका लागि पनि छोटो र सहज हुने स्थानीय व्यवसायी दीपक सिटौलाले बताए । आँखु खोलामा ६१ मिटर लम्बाइको बेलिब्रिज जडानका लागि मध्यपहाडी लोकमार्ग आयोजनाले ६ करोड रकम खर्चेको हो । सो बेलिब्रिज जडानका लागि सडक विभागअन्तर्गतको सो आयोजनाले जलप नेपाल निर्माण सेवालाई जिम्मा दिइएको हो । पुल ८८ दिनमा जडान गरी सम्पन्न गरेको थियो ।
