त्रिशूलीबजार । नुवाकोट जिल्लाको विदुर नगरपालिका-८ मा रहेको भैरुम माध्यमिक विद्यालय हात्तीगौँडामा अतिरिक्त समयमा सञ्चालित चिनियाँ भाषा (हानयी, चोङ वन) र सूचना प्रविधि (आइटी) विषय अध्ययनरत विद्यार्थी गत हप्ता दीक्षित भएका छन् । विद्यालयमा अध्ययनरत कक्षा ११ र १२ का विद्यार्थीलाई लक्ष्य गर्दै सञ्चालित हानयी र आइटीसम्बन्धी प्रारम्भिक तहको अध्ययन पूरा गरेका ५० विद्यार्थी दीक्षित भएका हुन् । गत भदौदेखि सुरु भएको कक्षा गत हप्ता सकिएको हो ।

प्रारम्भिक तहको अध्ययन पूरा गरेका विद्यार्थीलाई चीन सरकारको सान्दोङ फोरेन ट्रेड भोकेसनल कलेजबाट आएका प्रशिक्षक र जिल्ला समन्वय समिति नुवाकोटका उपप्रमुख दलबहादुर तामाङले प्रमाणपत्र प्रदान गरे । चिनियाँ दूतावासको आर्थिक तथा प्राविधिक सहयोगमा ११ र १२ कक्षाका विद्यार्थीसहित स्थानीय युवालाई लक्षित गरी सञ्चालित भाषा र सीप विकासको तह विद्यार्थीले सफलतापूर्वक तीन महिनामा पूरा गरेको ओभरसिज ट्रेडिङ सेन्टर इन नेपालका कोअर्डिनेटर रामचन्द्र पाण्डेले जानकारी दिए । उनका अनुसार नेपालमा पहिलोपटक नमुना परीक्षणका रूपमा चिनियाँ दूतावासको सहयोगमा सञ्चालित भाषा र सीप विकास अध्ययन विद्यार्थीले सहज रूपमा पूरा गरेका छन् । दूतावास अब अहिलेका विद्यार्थीलाई माथिल्लो तह र नयाँ कक्षाका विद्यार्थीलाई समावेश गराउने तयारीमा रहेको जानकारी प्राप्त भएको जिससका उपप्रमुख तामाङले जानकारी दिए । ‘परीक्षणका रूपमा नेपालमा पहिलोपटक सुरु गरिएको कार्यक्रममा विद्यार्थीको सफलताले दूतावास उत्साहित भएको छ,’ उनले भने, ‘अध्ययन र सीप सिकाइको तह पूरा गरेकामध्ये उत्कृष्ट विद्यार्थीलाई अध्ययनका लागि चीन जाने अवसरसमेत उपलब्ध हुनेछ ।’

कार्यक्रमको सफलतापश्चात् नुवाकोटमा नै थप कार्यक्रम विस्तारसहित शिक्षा क्षेत्रमा सहयोगका कार्यक्रम सञ्चालनका लागि दूतावासले यहाँबाट प्रस्ताव माग गरेको छ । विश्वका एक सयभन्दा बढी देशमा भाषा र सूचना प्रविधिसम्बन्धी कक्षा सञ्चालन गरेको चीन सरकारले नुवाकोटसहित चीनसँग सीमा जोडिएका जिल्लामा सो कार्यक्रमलाई विस्तार गर्न चाहिरहेको छ । सान्दोङ भोकेसनल कलेजले नेपालको ओभरसिज ट्रेडिङ सेन्टर इन नेपालसँगको सहकार्यमा कक्षा सञ्चालनमा ल्याएको थियो । चिनियाँ कलेजले तयार गरेको पाठ्यक्रम र सोही पाठ्यक्रममा आधारित कक्षाको प्रारम्भिक तहको अध्ययन पूरा गरेका विद्यार्थीले ‘चोङ वन’ मा पढ्न, लेख्न र कम्प्युटरमा आधारित सीप विकाससम्बन्धी (प्रविधि) काम गर्न सक्ने भएका छन् ।